മറുക്

( You are an expatriate. You’ ve lost touch with the soil........

-Ernest Hemingway)

കാലങ്ങൾക്കു ശേഷം

വീടുതുറന്നു കയറുമ്പോൾ

പൂമുഖം ചോദിച്ചു

“ നിന്റെ മണമെങ്ങുപോയി? ”

തെരുവുകളിലെങ്ങോ

കളവുപോയ കാര്യം

ഞാൻ പറഞ്ഞില്ല.

കിടപ്പറ ചോദിക്കയാണ്,

അശ്വവേഗങ്ങളെവിടെയെന്ന് !

പന്തയപ്പുരകളി-

ലെരിഞ്ഞുപോയ വിവരം

പറയാതെ ഞാനൊഴിഞ്ഞു.

രുചികൾക്കെന്തുപറ്റിയെന്നാ‍ണ്

അടുക്കളയ്ക്കറിയേണ്ടത്.

ശീതീകരിച്ച്,

കയറ്റിയയ്ക്കാൻ വച്ച കാര്യം

ഞാനെങ്ങനെ വെളിപ്പെടുത്തും.

തിരക്കുകളു-

മലങ്കാരങ്ങളുമഴിച്ച്

പിറന്നപടി

കണ്ണാടി നോക്കുന്നേരം

എനിക്കും തോന്നുന്നുണ്ട്

ന്യായമായ ചിലതൊക്കെ !

ആരാണു താങ്കൾ ?

പേര് ?

വിലാസം ?

തിരിച്ചറിയാനൊരുപാധി ?

ഓർമ്മയുടെ-

യൊരു മറുകെങ്കിലും !!