നെയ്ച്ചോറ്

ഊണുമേശയിലെത്തുമ്പോൾ

രുചിയുടെ പല കടലുകൾ

‘ഇതിലേ ഇതിലേ’ യെന്നിരമ്പി

മണത്തിന്റെ ചില തെരുവുകൾ

അപ്പോളടർത്തി വച്ച‌ കനികൾ

കനവുകൾ

ശ്രദ്ധയോടുപചാരം പാടുന്ന പിയാനോ.

അടഞ്ഞും പാതികൂമ്പിയും

അലങ്കാരപ്പൂക്കളോടൊരു വേള

പേരുചോദിച്ചും

ഒരിലയോ

നാരോ

രുചിച്ചു നോക്കുമ്പോളാകട്ടെ

കടൽ പൊടുന്നനെ നിലച്ചുപോയ പോൽ !

തെരുവുകൾ നേരത്തെയടഞ്ഞുപോയ പോൽ !!

നിലച്ച തിര നീന്തി

നീലിച്ച വഴി താണ്ടി

വീട്ടിലെത്തുമ്പോഴേക്കും

രാവേറിയിരിയ്ക്കുന്നു.

മാർജ്ജാരപദച്ചേലിൽ

കുശിനി തുറക്കുമ്പോൾ

എന്തൊരു ഭാഗ്യം !

അമ്മയുറങ്ങാതിരിപ്പുണ്ട്.

അരികി-

ലോർമ്മയിട്ടു വറ്റിച്ച

നെയ്ച്ചോറല്പം !!