തുള്ളിനീലം

ആകാശത്തിന്റെ അന്തസ്സത്തയാണ്

ആഴിതന്നാഗാധതയ്ക്കൊപ്പം

സമം ചേർത്ത്

കുപ്പിയിലടച്ചു വച്ചതാണ്.

ഹൃദയത്തോളം

നിറംചോർന്നുപോയ വസ്ത്രങ്ങളോ

അതല്ല

വസ്ത്രങ്ങളോളം

വെളിച്ചംകെട്ട ഹൃദയമോ

എന്തുമാകട്ടെ

കേവലമൊരുതുള്ളി മതിയാകും

വെണ്മയുടെ വിസ്മയമൊരുക്കാൻ !

മുക്കിപ്പിഴിഞ്ഞുണക്കി

ഇസ്തിരിവടിവിൽ

ഉടുത്തൊരുങ്ങിയിറങ്ങുമ്പോൾ

മഹാശയൻ !

താങ്കളൊരലങ്കാരം തന്നെയാകുന്നു

വീടിനും വീഥികൾക്കും.

നിന്റെചിന്തകൾ നോക്കിനിൽക്കുന്നൂ

വിൺഗംഗകൾ

നിൻപദം ചേർന്നു

മെല്ലെ മിടിപ്പൂ പെരുങ്കടൽ

(ആരുമേകാണുന്നില്ലെ-

ന്തൊരാശ്വാസം,

നീലച്ഛവി തൂവി നാം

മറച്ചിട്ട നരച്ച പ്രണയങ്ങൾ !!)

ആകാശത്തിന്റെ അന്തസ്സത്ത തന്നെയാണിത്

തൽക്കാല മറവിയുടെ തുള്ളിനീലവും.