വായിക്കാനെന്തെങ്കിലും
പരതി നടന്നതിന്നൊടുക്കം
കയ്യിൽത്തടഞ്ഞ-
തൊരുടലാണ്‌.
പേടിയുടെ
പുസ്തകമുറികളൊന്നിൽ
പുറഞ്ചട്ടപോലുമില്ലാതെ
കിടപ്പായിരുന്നത്.
വീടെത്തി-
യേകാന്തത്തിൽ
വായന തുടങ്ങുമ്പോൾ
അത്ഭുതം!
അക്ഷരങ്ങളൊന്നുമേ
കാണ്മാനില്ല.
എവിടെപ്പോയിരിക്കുമവരെന്നു
സശ്രദ്ധം
തിരയുമ്പോൾ
തെളിയുന്നുണ്ടോരോ
താളിലും, തളിരിലും
ചില വരകൾ,കുറികളും.
അടുക്കില്ലാതെ ചില ചിന്തകൾ
ഇടയ്ക്കു നിർത്തിപ്പോയ പാഠങ്ങൾ,കണക്കുകൾ
ആർക്കുമേ തിരിയാത്ത ക്യൂണിഫോം വഴക്കങ്ങൾ.
അത്തരം ഭാഷകളെ-
യടുത്തറിയാവുന്നൊരാളാണതു
പറഞ്ഞത്.
" ലിപിയല്ലിത് !
രുചിഭേദത്തിന്റെയളവും മുറിക്കലും
ഋതുഭേദത്തിന്റെ നനവും നിറയ്ക്കലും
മാത്രം.
എന്നാലും സാരമില്ല
വായിക്കാനെളുപ്പമീ കാവ്യം.
ബ്രെയിൽ മാതൃകയെന്നോണം
വിരലോടിച്ചാൽ മതി,
അഴിഞ്ഞേവീണുകിട്ടു-
മക്ഷരരഹസ്യങ്ങൾ "
ക്യൂണിഫോം- അതിപ്രാചീന വരമൊഴി
ബ്രെയിൽ- വിരൽസ്പർശം കൊണ്ടറിയുന്ന, അന്ധരുടെ ഭാഷ,
5 comments:
ശരിക്കും നന്നായിട്ടുണ്ട്. അടുത്ത കാലത്ത് വായിച്ച ബ്ലോഗ് കവിതകളില്‍ തെറ്റില്ലാത്ത ഒന്ന്. ആദ്യ നാലുവരികള്‍ തൊട്ട് തന്നെ ഒരു കവിതത്തം അനുഭവപ്പെടുത്തുന്നു
പേടിയുടെ പുസ്തകമുറിയിലെ ഉടൽ വായന- ഉടലിൽ നിന്ന് അക്ഷരരഹസ്യങ്ങൾ, വിരൽ മീട്ടുമ്പോൾ ... നല്ല കൌതുകമുണർത്തുന്ന കവിത.
നല്ല വാക്കുകള്‍... :-)
നന്ദി, ശ്രീനാഥനും,രൈഹാനയ്ക്കും,അരുണിനും,അബു ഷിഫയ്ക്കും മറ്റനേകർക്കും.
ഓരോ വായനയും ഓരോ വാതിൽ തുറക്കുന്നു.പിന്നെ ഹൃദയത്തിലേക്ക് ചേർത്ത് ചാരുന്നു.
എന്നാലും സാരമില്ല
വായിക്കാനെളുപ്പമീ കാവ്യം.
ബ്രെയിൽ മാതൃകയെന്നോണം
വിരലോടിച്ചാൽ മതി,
അഴിഞ്ഞേവീണുകിട്ടു-
മക്ഷരരഹസ്യങ്ങൾ .......
ഉദാത്തമായ ഭാവനകൾ വിടരുന്നുണ്ടിവിടെ...
Post a Comment