കാഴ്ചയുടെ പ്രശ്നങ്ങൾ

വിശദാംശങ്ങളാണ്‌ ആദ്യം നഷ്ടപ്പെട്ടത്‌..
നിന്റെ സ്നേഹത്തിന്റെ അരികുകളിൽ
ഭംഗിയായി തുന്നിച്ചേർത്തിരുന്ന
കസവുനൂലിഴ കാണാതായി.
എന്നാലും സാരമാക്കിയില്ല..

പിന്നൊരിക്കൽ
നാനാർത്ഥങ്ങളുടെ ശേഖരത്തിൽ നിന്ന്
നമുക്കുള്ളതു കാണാനാകാതെ കണ്ണു കടഞ്ഞു.
ചില പ്രശ്നങ്ങളുണ്ടെന്നു തോന്നി..

ശരിക്കും ഗൗരവമാർന്നതു പിന്നീടാണ്‌..
ഭൂമിശാസ്ത്ര പഠനത്തിനുള്ള നോട്ടു തയ്യാറാക്കുമ്പോൾ
സാന്ത്വനത്തിന്റെ പച്ചത്തുരുത്തുകൾ കണ്ണിൽപ്പെട്ടില്ല !!

അങ്ങനെയിരിക്കെ
കടലാഴങ്ങൾ കടന്ന്
കണ്ണീരുമുപ്പും മണക്കുന്ന
കൈകളുള്ളൊരാൾ
വീട്ടിൽ വന്നു.

പ്രശ്നം കേട്ടു കഴിഞ്ഞ്‌
'എത്ര നിസ്സാര'മെന്നു ചിരിച്ചിട്ട്‌
അയാളൊരു കുഴമ്പു തന്നു.

കാഴ്ച തിരിച്ചുകിട്ടിയെങ്കിലും
ഓരോ ദൃശ്യങ്ങളിലും കടലിരമ്പുന്നുണ്ടെന്ന്
എനിക്കു്
തോന്നിത്തുടങ്ങിയതന്നു തൊട്ടാണ്‌